Надышлі марозы,
Рэчкі закавалі,
Белыя бярозы
Шэранем убралі.

Замялі дарогі
Ветрыкі снягамі.
Лес, як дзед убогі
З доўгімі вусамі.

Апусціў галіны
І стаіць журботна,
Зрэдку верхавіны
Зашумяць маркотна.

Мяккая пярына
Вочы адбірае.
Белая раўніна -
Ні канца, ні краю.

Пад пялёнкай белай
Травы і лісточкі.
Рэчка анямела,
Змоўклі ручаёчкі.

Амярцвелі лозы,
Чуць галлём хістаюць,
А ў палях марозы
Ды вятры гуляюць.

Якуб Колас

На рэчцы зімою

Урывак
Не сядзіцца ў хаце
Хлопчыку малому;
Кліча яго рэчка,
Цягнуць санкі з дому...

Якуб Колас

Завіруха

У бубны дахаў вецер б'е,
Грыміць па ім, звініць, пяе,
І спеў ліецца ўсё мацней, -
Гулянку справіў пан Падвей.

У бубны дахаў вецер б'е,
Грыміць па ім, звініць, пяе.
Ўскіпела снежнае віно,
І белай пенай мкне яно.

У бубны дахаў вецер б'е,
Грыміць паім, звініць, пяе.
Па вулках вее дзікі хмель,
Гудзіць сп'янелая мяцель.

У бубны дахаў вецер б'е,
Грыміць паім, звініць, пяе.

Максім Багдановіч

Зімовая дарога

Шпарка коні імчацца ў полі,
Сумна бомы гудзяць пад дугой,
Запяваюць аб долі і волі,
Навяваюць у сэрцы спакой.

Ўюцца змейкай срабрыстай дарожкі,
Брызгі золата ў небе блішчаць,
І маркотныя месяца рожкі
Праз марозную мглу зіхацяць.

Поле нікне ў срэбным тумане,
Снег блішчыць, як халодная сталь,
І лятуць мае лёгкія сані,
Унашуся я ў сінюю даль.

Максім Багдановіч

Сняжынкі

Сняжыначкі-пушыначкі
Ляцелі матылькамі,
Над хмызамі над шызымі
Дыміліся дымкамі.

Зіхцеліся, мігцеліся
У розныя калёры.
Драбнюткія, пякнюткія,
Як зоранькі, як зоры.

Насіліся, кружыліся
Над ціхімі палямі.
Даліначкі сняжыначкі
Пакрылі дыванамі.

Над елкамі, над хвойкамі
Спявалі песні-баі:
"Мы хатачкі-палатачкі
будуем тут у гаі.

Маленькія, міленькія,
Дзіцяткі-птушаняткі,
Ляціце вы, скачыце вы
У светленькія хаткі!

Вушастыя, пушыстыя,
З драцінкамі-вусамі
Вы, зайчыкі-малойчыкі, -
У хаткі к нам таксама!"

Сняжыначкі-пушыначкі
Спявалі песні-баі:
"Мы хатачкі-палатачкі
будуем тут у гаі".

Змітрок Бядуля

Дзесяты падмурак

Урывак
Падаюць сняжынкі -
дыяменты росы,
Падаюць бялюткі
за маім акном...

Расчасалі вішні
шоўкавыя косы
І ўранілі долу
снегавы вянок.

Дзесьці ў прасторах
празвінелі бомы,
Дацвілі пялёсткі
нейчае тугі...

І здаецца зноўку -
еду я дадому
Пераведаць родных,
блізкіх, дарагіх.

Адхінае вечар
тонкія мярэжы,
На акне альвасы
дагарэлі ў сне,

А ў душы квяцістасць,
і такая свежасць,
І з вачэй усмешкі
сыплюцца на снег.

Зноў зіма паслала
снежныя кілімы,
Зажурыла беллю
паплавы, лугі,

І прыходзіць радасць
у красе маўклівай.
Адплываюць хвілі
смутку і тугі...

А сняжынкі сеюць
кволую імглістасць,
Падаюць бялюткі
за маім акном,

І цвіце на вішнях
снежная ўрачыстасць,
Сцелецца на скронях
перад раннім сном.

Хочацца навеяць
казкі-таямніцы
Гукамі мелодый,
радасцю без слоў.

І застылі цені
у маёй святліцы,
Засынаю... Сніцца
роднае сяло.

Паўлюк Трус

Сцюжа скокі пачала,

Паскакала да сяла,
Сіганула цераз лес,
Наляцела на экспрэс,
Да мястэчка дакаціла.
Сцюжа - моц! У сцюжы - сіла.
Хай сваволіць, хай злуе!
Не баюся я яе.

С. Сокалоў-Воюш

Зіхатлівыя сняжынкі

Па зямельцы Дзед Мароз
Поўны мех сняжынак нёс.
Рассяваў іх па палях,
Па лясах і па лугах,
Рассяваў па ўсіх сцяжынках
Зіхатлівыя сняжынкі,
Каб святлей было на свеце,
Каб гулялі з імі дзеці.

Пятро Сушко

Госці

Новы год - і госці зранку
Прыляцелі ў сад да Янкі,
Снег ідзе, мароз трашчыць,
Цяжка птушкам бедным жыць.
У кармушках каля хаты -
Крошкі хлеба і зярняты.
Тут сініцы, снегіры,
Хоць у рукі іх бяры:
Не баяцца госці-птушкі
Тых, хто робіць ім кармушкі.
І малюе іх даўно
Янка, гледзячы ў акно.
Новы год - мароз трашчыць,
Ды лягчэй і птушкам жыць.

Міхась Сазончык

Чароўны абрус

У маёй бабулі
Ёсць абрус чароўны.
Ёй яго падарыў
Снегавік галоўны.

Ён рассыпаў на абрусе
Крохкія сняжынкі,
Па краях запаліў
Зорачкі-імглінкі.

Разматаў на ніткі
Снежныя клубочкі -
Паляцелі па абрусе
Птушкі-галубочкі.

Потым асцярожна зняў
Ён узоры з лужын -
Даў у дзюбкі галубкам
Снежныя ружы.

Накрухмалілі абрус,
На стол засцілаюць.
І вы чуеце? Ільдзінкі
Хрумсцець пачынаюць.

Галіна Багданава

Загадка

Носіць ён кажух чырвоны
І прыходзіць раз у год,
Каля ёлачкі зялёнай
З дзецьмі водзіць карагод.
(Дзед Мароз)

Ірына Чарняк

Кажух

Дзед Мароз
Прыйшоў да нас
-- Добры дзень!
Якраз у час.
Ледзьве пераводзіць дух:
-- Дужа душны
Мой кажух, --
Дзед з усмешкаю гаворыць,
Падарункі шчодра дорыць.

-- Дай, кажу, --
Кажух казе,
Белай холадна ў лазе.
Паглядзі, дрыжыць каза,
Быццам на шчацэ сляза
Ці ільдзінка ў барадзе.
Дзед і запытаўся:
-- Дзе
Тая белая каза
І азяблая лаза?
Сам па гурбах
Шлях прамераў.
Глянуў я -
Ані куста,
Ні казінага хваста
Ні відаць.
Накрыў кажух
І казу ў лазе
І луг.

Рыгор Барадулін

Кружацца сняжынкі

Хто там шустры скача?
Ціха снег рыпіць -
Гэта зайка з дачы
Праз лясок бяжыць.

Кружацца сняжынкі,
Нібы ў дзіўным сне.
Зайка для Дарынкі
Торбачку нясе.

А ў ёй - пажаданні
Добраю расці,
Быць заўжды стараннай,
Шчырай у жыцці.

Хоча ён з Дарынкай
Сам на Новы год
Хоць бы на хвілінку
Стаць у карагод.

Міхась Пазнякоў

Пад Новы год

Кожны раз пад Новы год
Ладзяць ёлкі карагод,
Потым разбягаюцца -
З дзецьмі сустракаюцца.

З белым снегам на галінках
І да нас прыйшла ялінка,
Мо сама, а мо прынёс
Добры, шчодры Дзед Мароз.

У яго святочным клунку
Многа розных падарункаў.
Гэта - радасці крыніца,
Будзем разам весяліцца.

Фама Ляшонак

Дзед Мароз

Ёлка. Ззяе хата.
Падарункаў - воз
Нам прывёз на свята
Добры Дзед Мароз

Шчокі падфарбуе,
Ушчыкне за нос,
Бегчы патрабуе
Моцны Дзед Мароз.

Абяліў пагоркі,
Снегу шмат нанёс
На каткі і горкі
Дужы Дзед Мароз.

Пойдзем мы на горку
Ці на лыжны крос -
Будзе й там вясёлы
Спрытны Дзед Мароз.

Дзеці, адгадайце:
Свята хто прынёс?
Ведаем і скажам
Гучна: "Дзед Мароз!"

Уладзімір Мацвеенка (трохі апрацаваны)

Ёлка-вясёлка

Надвячоркам у бары
Гуртам збегліся звяры,
Каб наладзіць карагод
І паклікаць Новы год.

Падказаў адразу Лось:
- Побач тут палянка ёсць,
На ёй ёлка гожая,
Стройная, прыгожая...

Першым шэры Воўк прыбег
І вакол расчысціў снег.
Тут Вавёрка з дрэва - скок,
Развязала свой мяшок:

- Ёсць грыбы, арэхаў з дзесяць,
Трэба будзе іх развесіць...
Прапішчала з норкі мышка:
- А ў мяне старая шышка.

Зай тры морквіны прынёс
І расчуліў аж да слёз,
Як сказаў: "На жаль, сябры,
Засталося толькі тры..."

А Лісіца ўздыхае:
- Нам чагосьці не хапае...
- Паглядзіце! - крыкнуў хтосьці, -
Дзед Мароз шыбуе ў госці!..

Дзед як выйшаў на паляну,
На звяроў з усмешкай глянуў:
- Не сумуйце! Як магу,
Вам, сябры, дапамагу.

Ёлку ён паварушыў,
Шэранню прыцярушыў
І паклікаў:
- Снегіры,
Не хавайцеся ў бары,
На паляну прылятайце
І на ёлачку сядайце!

Прыляцелі снегіры,
Як чырвоныя шары,
І, нібыта на арэлі,
На галінкі важна селі.

Упрыгожаная ёлка
Зазіхцела, як вясёлка.
І запляскалі ўсе ў ладкі,
І наўкруг пайшлі ўпрысядкі...

Уладзімір Мацвеенка

Карагод

У бары
Пал Новы год
Звяры
Ладзяць карагод.
Глянь,
Паўсталі цесна ў круг
Лань,
Вавёрка і Вяпрук,
Касавокі
Зай з Ваўком,
Рудабокі
Ліс з Катом.
Ім
Сягоння Дзед Мароз
Падарункі ўсім
Прынёс.
Толькі
Пагулялі ледзь,
Нехта ўспомніў:
- Дзе ж Мядзведзь?
У бярлозе,
Ля сасны,
Сніць
Аб Новым годзе
Сны.

Новы год

Новы год, Новы год -
Радасны, вясёлы,
Водзім карагод
Мы ля ёлкі сёння.

Ёлка ззяе, свеціцца
Яркімі агнямі,
Нам ужо не верыцца,
Што прыбралі самі.

Вікторыя Верабей

У лесе

Добра ў лесе зімою!
Снег іскрысты блішчыць,
Цешыць лес цішыню,
Быццам сонны стаіць.

Толькі зайка бялёсы
Тут пакіне свой след,
Ноччу бліжай да вёскі
Выйдзе воўк на абед.

Дзед Мароз выбірае
Ў лесе ёлку як раз -
І на свята спяшае,
Каб парадаваць нас.

Павал Каткавец

Снежань

Снежак смех.
Санак след.
Снежна. Санна. Свежа.

Цінькае сініца
У асінніку.

Па-над плошчай,
Дзе на варце часу - вежа,
Заінелі стрэлкі
На гадзінніку.

Анатоль Вялюгін

Смачная ёлка

Дзеці ў школьнай зале
Ёлку прыбіралі.
Начаплялі новых
Цацак каляровых.
Ёлка ўдзячна Жэньку
За арэшкаў жменьку.
Падарыла Верка
Зорачкі цукерак.
І павесіў Янак
З макам абаранак.
Ззяе, як вясёлка,
Смачнай стала ёлка.

Ала Кажэра

Пінгвін і карціна

У святочны дзень
Пінгвіну
Падарыў сусед карціну.
Разабраў пінгвіна смех,
Бо навокал толькі снег -
І няма куды
Пінгвіну
Вешаць гэтую карціну.

Уладзімір Марук

Зімовая калыханка

Лес спявае калыханку
Рэчцы і ракітам,
Каб заснулі яны ранкам
Ціхім сном блакітным.

І прыносіць вецер лесу
Калыханкі-спевы,
Каб заснулі да прадвесня
Ўсе лясныя дрэвы.

Уначы спявае месяц
Зоркам сінявокім:
"Пакуль сонейка не свеціць,
спіце сном глыбокім".

А мароз трашчыць на ганку,
Цёпла ў нашай хаце,
Я спяваю калыханку
Сваёй ляльцы Каці.

Вера Вярба

Зімой

Пад снягамі спіць багун,
Бор сцярожка слухае.
Да лугоў наўпрост бягуць
Зайцы даўгавухія.

Абступаюць стог-таўстун,
Толькі шолах чуецца.
Сенам пахне за вярсту -
Белякі ласуюцца.

Дасць у ноздры водар-пах -
Як жа тут не чыхнуць!
Вартавымі па пяньках
Заяц ды зайчыха.

Ды не бачаць, як мароз
Па снягах-палотнах
Ціха крочыць між бяроз:
-- Зайцаў напалохаю!..

І ля самае зямлі,
Там, дзе след іх выстрачан,
Глуха грымне у камлі,
Як са стрэльбы выстраліць.

Дзе падзенешся, дружок, --
Ні кала, ні кусціка!
Касавокія наўцёк
Па сумётах пусцяцца.

Доўга сэрца не суняць
У бары трывожным.
Ну а ранкам сена сняць
І лугі мурожныя.

Шчодры вечар

Надышлі калядныя дзянькі -
Адзвінелі на катку канькі.

Вечарам ля кожнага двара
"Шчодрыкі" спявае дзетвара.

І спадае з неба белы пух,
Каб святлейшым стала ўсё наўкруг.

Дзякуй Богу, добры снег ідзе,
Шчодры вечар Каляду вядзе!

Хведар Жычка

Глядзіце таксама

Зімовая чытанка

Цэтлікі (тэгі)

| зімовыя вершы |

julcik, 8.09.06 10:14

Адзнакі: 5.00/5.00 [1]

Няма каментараў да гэтага артыкула

Перайсці:

У артыкулах захаваны правапіс аўтара. Тэксты выкладзеныя ў азнаямленчых мэтах. Калі знаходжанне пэўнага тэксту ў нашай бібліятэцы парушае Вашыя аўтарскія правы - калі ласка, паведамце пра гэта па адрасе dzietki@gmail.com і мы тэрмінова прыбяром тэкст з сайту.
© "Нашыя дзеткі", 2006-2010. Усе правы абароненыя. Выкарыстанне матэрыялаў у камерцыйных мэтах ЗАБАРОНЕНАЕ. Пры некамерцыйным выкарыстанні матэрыялаў спасылка на сайт "Нашыя дзеткі" абавязковая.
Па ўсіх пытаннях лістуйце нам!