Нашыя дзеткі : Абэцэда

	А 1. Анатоль-абібок Адшукаў агурок. Гадаваць не хацеў, А пад'есці - пад'еў. 2. Аранжавы аловак Аднойчы абламаўся: Ад востранькае дзюбы Адзін пянёк застаўся. Анэля свой аловак Тачылкай натачыла: - Малюй ізноў прыгожа, Цябе я падлячыла!
	Б 1. Бусел, бусел, ходзіш што ж Па балоце басанож? Боты трэ' было пашыць, Болей ногі не мачыць! 2. Бу-бу-бу - пачышчу бульбу, Будзе булькаць на пліце. Бульбу лепш чым у бабулі Вы не знойдзеце нідзе!
	В Вавёрка высока дупло адшукала, Грыбоў і гарэшкаў туды нацягала. Васіль наш знайшоў то дупло выпадкова, "Мо', ўзяць у кішэню? Чаго тут благога?" Ваверка ж збірала гарэхі усё лета! Васілю, не крыўдзі вавёрчыных дзетак!
	Г 1. Гром грыміць, грукоча град, Грак грувасціцца на граб 2. Галя гальштук начапіла, Галя ляльцы гаварыла: - Глянь у люстра, лялька Ната: Ты - як я, а я - як тата!
	Д Дзяцел дзюбай дуб далбіў: Для дзяцей дупло рабіў. Давялося дзятлу доўга У драўніне дзірку дзёўбаць, Ды дубовае дупло - Дзеткам добрае жытло!
	Е Елка ехала у горад На машыне грузавой, Віншавала з Новым годам Цэлы свет і нас з табой!
	Ё Ёдам ёг фарбуе спіну, Мажа кожную драпіну. Лёг уночы на цвіках І падрапаў скуру. Жах!
	Ж Журавіны журавель Шчыпле на балоце. Жук шукае у журбе Жабку у чароце. Жавароначак звініць Над жытнёвым полем... Кожнаму жыццё пражыць Хочацца на волі.
	З Замак, на замок замкнёны, Задрамаў у лесе цёмным. Абудзіў яго турыст: - Ну-ка, замак, адчыніся! На цябе я падзіўлюся! Замкаў шмат на Беларусі.
	І Ішла іголка цераз лог, Знайшла іголка сена стог І начаваць засталась. Знайдзі яе ты зараз!
	Й КлеЙ праліўся на падлогу. Стаў МацеЙ анучаЙ соўгаць - І прыклеіўся. НадзеЙна! Добры клеЙ набыў МацеЙ наш!
	К Кавун-кавунок, У цябе стракаты бок! Адкажы праўду мне: Ты салодкі ці не? Калі так - ты мне дарэчы! Калі не - каціся прэч!
	Л Ліса лісліва і ласкава Труса паклікала на каву. Пра добры марыла абед. Але труса прастыў і след! Трус у ляшчынніку залёг: З лісой лепш бачыцца здалёк!
	М Пад дажджом матыль замок, Сумна пад лістом замоўк. Мурашы дапамаглі: Матылю ручнік далі. Мыцца матылю не трэба: Мокрым не ўзляціш у неба!
	Н Набыла Настачка нажніцы Краіць Наталлі нагавіцы. Але Наталля падвяла: У краме джынсы набыла. Ды не сумуйце вы, нажніцы: Ў нядзелю будзем шыць спадніцу!
	О Дзедавы узнагароды Не чапляюць без нагоды. Для Міколы гэта гонар - Патрымаць дзядуляў ордэн. Хай зайздросцяць сябрукі: У каго ёсць дзед такі?
	П Позна певень праспяваў, І на працу я праспаў! Так падвёў мяне Пятрусь, Як на працы я з'яўлюся? Каб наступны раз быў пільны, Пеўню падару... будзільнік!
	Р Ручай праз поплаў прабягаў, Раку ў чароце напаткаў. Якая радасць, далібог, Сустрэць радню ў чужых краёх! Ручай з ракою абняліся, Да мора разам падаліся.
	С На сонцы суніцы саспелі, А мы іх сабраць не паспелі. Мы ўсталі каля дзесяці, Паснедалі (доўга ж ісці!), Па компасе шлях вызначалі, Па лузе крыху паблукалі. Калі ж мы да леса дайшлі, Суніц там ужо не знайшлі.
	Т - Хто табе тэлефануе?- Запыталася матуля. - З кім ты размаўляеш, Чэсь? - Гэта робат, з АТС! Ён чамусьці мне сказаў, Каб я слухаўку паклаў!
	У Укусіў унука чмель, Аж зароў нябога. Да бабулі ўнук хутчэй Бег па дапамогу. Бег, як ад сабакі трус, Не глядзеў навокал. На ілбе з'явіўся гуз У выніку уцёкаў!
	Ў ВоЎк на поЎню Ўночы выЎ, СпеЎ разносіЎся наЎкол. ПаляЎнічы стрэліЎ быЎ - Не патрапіЎ. ВоЎк сышоЎ, ДалучыЎся да сяброЎ І спяваЎ на поЎню зноЎ.
	Ф Фарбаваў фатэль Францішак Фарбай фіялетавай. Атрымаўся фарбы лішак. Дзе дзець фарбу гэтую? - Пафарбую заўтра зранку Маме футра ды фіранкі!
	Х Апрануў хвартух Хвядорка, Стаў кухарыць хлопец. Слупам дым аж на задворках! Маці кажа: - Хопіць! Лепей ты зрабі прыборку, А гатуе хай Хадорка!
	Ц Цыбулю выцягнуў з грады Цімох за хвост зялёны. Хацеў пачысціць - ды куды! З вачэй - ручай салёны. Цыбулю хочаш распрануць - Чакай, што слёзы пацякуць!
	Ч Свішча чайнік гаваркі: - Смачна есці, сябрукі! Пачастуйцеся пячэннем Ды чарэшневым варэннем! Шчыра я люблю гасцей, Трэба бачыцца часцей!
	Ш Шпрыц іголку паламаў Ды замену ёй шукаў. І да елкі шпрыц звяртаўся, І у вожыка пытаўся, Падышоў і да краўца, Пацікавіўся ў шаўца - Ўсіх суседзяў абышоў, Таго, што трэба, не знайшоў!
	Ь Жыве у запалЬнічцы госцЬ, Пякучы, небяспечны. Націсне запалЬнічку хтосЬ - І выскачыць агенЬчык. Ты, калі ласка, зразумей: АгонЬ - не цацка для дзяцей!
	Ы ДЫня вЫрасла на полі, ВЫкаціла жоўтЫ бок. Варта дакрануцца толькі - Так і пЫрсне смачны сок! Шчыра просім частавацца, У баку не заставацца!
	Э Экскаватар тыдзень цэлы Рыў траншэю за вуглом. Потым людзі клалі цэглу, Збудавалі новы дом. Гэты дом усім вядомы: Мы жывем у гэтым доме!
	Ю Ў юрце цёпла, ў юрце суха. А знадворку - завіруха! Завіхаюцца вятры, Завываюць на двары. Сыплюць снег, мароз нясуць, Спаць спакойна не даюць!
	Я Яблык з яблыні упаў. Яблык на зямлі ляжаў. Ян і Ясь яго знайшлі, Падзялілі і пайшлі. Смак сапраўдны ты адчуеш, Калі сябра пачастуеш!